PEMENTOS DO PIQUILLO RECHEOS

Receita elaborada. 

Tivemos que vencer os prexuizos: "Non me gusta o bacallao", "Nunca probei os pementos"... 

E superamos a proba con nota. Todo o mundo probou os pementos recheos e todos deron a súa conformidade á receita, á mistura de sabores... 

É agradable e satisfactorio comprobar que no noso obradoiro imos superando barreiras e vencendo os medos a probar novos sabores. Simplemente por iso merece a pena seguir cociñando e...seguir descubrindo cousas tan sinxelas como o funcionamento dunha picadora eléctrica ou a composición dun "FUMET". Cousas da vida! 

PEMENTOS DO PIQUILLO RECHEOS

           

Ingredientes

·         Pementos do Piquillo enteiros

·         300 g de bacallao desalgado

·         2 cebolas pequenas

·         2 allos

·         50 ml de viño branco

·        150 ml de caldo de peixe

·         1 lata de carne de caranguexo

·         50 ml de nata

·         Aceite de oliva

·         Sal e pementa

·         Fariña e ovo

           

Preparación

1.    Sofreír unha cebola cun fondo de aceite (7´aprox.). + Allo picados finamente, + media culler de fariña, + viño branco, + bacallao esmiuzado, + caranguexo esmiuzado e libre de auga + caldo de peixe, + sal. (5´aprox.).

2. Escorregar e despebidar os pementos e rechealos cunha manga coa preparación anterior.

3.   Prebe: Sofreír un allo laminado + dúas culleradas de aceite. Retiralo e engadir a outra cebola e sofreíla 7´aprox.+ un pemento piquillo picado, + un pouco do recheo, + un pouco de fumet. Esparexer con media culleriña de fariña  e refogar 2´. Engadir a nata fóra do lume e remexer. Pasar por un chino.

4.    Rebozar en fariña e ovo os pementos pechados cun palillo e fritilos.

5.    Dar un fervor á salsa e vertela e colocar nela os pementos recheos.

Para saber máis: A PASTA

" A pasta é unha das ensinanzas que Italia legou ao mundo. É un alimento familiar que reúne sinxeleza, alto valor nutritivo e baixo custo. A serie ("A DIETA MEDITERRÁNEA") viaxou á Toscana italiana. En Siena -a cidade do Palio- Coñeceremos como se elabora a pasta fresca e a pizza".

                                          PASTA

ESPAGUETIS CON PREBE DE QUEIXO E NOCES

Un prato fácil e rico. Que sería de nós sen este saboroso e socorrido produto culinario!

"Denomínanse pasta os alimentos preparados a partir dunha masa (a palabra pasta vén do italiano "pasta", que significa masa) cuxo ingrediente básico é a fariña de trigo mesturada con auga formando un produto que xeralmente é cocido en auga. Comunmente adóitase empregar a especie Triticum durum (trigo duro) na súa elaboración."
     https://gl.wikipedia.org/wiki/Pasta

Pódense atopar diferentes tipos de pasta, fresca ou non, e de diversos tamaños, formas e variedades. Probablemente a máis coñecida é o espaguete. Os macarróns son outro dos tipos de pasta máis coñecidos, estes son de diversos tamaños, aínda que os máis coñecidos son aqueles de forma cilíndrica e ocos."

      Para saber máis: https://es.wikipedia.org/wiki/Pasta

                                  https://es.wikipedia.org/wiki/Anexo:Pastas#Formas_Irregulares

ESPAGUETIS CON PREBE DE QUEIXO E NOCES

           

Ingredientes

·         500 g de espagueti

·         2 dentes de allo

·         100 g de noces peladas

·         300 g de queixo ricotta

·         350 l de leite

·         100 ml de viño branco

·         2 culleradas de aceite de oliva

·         Pemento doce

·         Ceboliño picado

·         Sal e pementa

                                              

Preparación

1.    Laminar os allos e picar as noces

2.  Nunha tixola co aceite, dourar os allos e engadir as noces. Refogalas uns minutos. + Viño branco e que evapore o alcol.

3.    + Leite, + ricotta. Salpimentar. Mesturar cunha culler de madeira e cocer uns minutos máis. Reservar o prebe.

4.  Cocer os espaguetis ao dente en abundante auga salgada. Arrefrialos con auga fría nun coador.

5. Servilos condimentados co prebe reservado. Esparexer cun pouco de pemento doce, ceboliño picado e unhas poucas noces sen picar.

BISCOITO DE LIMÓN

Á segunda foi a vencida!

Si, si. Tivemos que facer a receita dúas veces. Todo ía ás mil marabillas. Cadramos o tempo de cocción. Fixemos a proba do "pinchado". Todo perfecto. Desmoldámolo (sen deixalo arrefriar co forno entreaberto) e a pinta seguía a ser espectacular. Non puidemos comelo no momento por falta de tempo, os nosos cociñeiros estiveron un pouco "atascados" e o tempo botóuselles enriba. Pero as previsións eran boas.

Ao día seguinte...aquilo non era comestible! Cando lle quitamos o pano o noso biscoito perdera volume e amazocouse de tal xeito que non había forma de entrarlle. Que bágoa!

Pero no segundo intento con lixeiras variacións na receita e un agarimo especial á hora de arrefrialo tivemos éxito. 

Aquí vos mostramos a proba fidedigna do noso traballo. 

BISCOITO DE LIMÓN

           

Ingredientes

·         250 g de fariña ou (3 vasos-medidas iogur)

·         250 g de azucre ou (2 vasos-medida de iogur)

·         250 g de manteiga ou (1 vaso-medida iogur de aceite)

·         4 ovos

·         1 sobre de levadura en po

·         1 iogur natural

·         Zume de ¼  limón / Rela limón

·         Azucre glas

                      

Preparación

1.   Bater ovos + azucre. +Iogur. + Aceite. + Zume / rela ata obter mestura cremosa.

2. + 250 g de fariña e levadura baturadas. Mesturar ata obter masa lisa e homoxénea.

3.  Encamisar molde. Verter a masa anterior e nivelala. Ao forno prequecido a 180ºC / 30´aprox.

4.  Apagar/ entreabrir o forno e atemperar o biscoito. Desmoldalo e cubrilo co azucre glas.

CROQUETAS DE ATÚN E ALGAS

As croquetas! Non hai nada mellor que unhas boas croquetas de entrante en calquera celebración que se prece. As nosas teñen un toque mariño. Poderiámolas chamar con todos os honores as CROCOMARES (croquetas coquetas do mar), porque, sen dúbida, quedaron preciosas e apetecibles. 

Bo proveito para os que se atrevan a probalas.

CROQUETAS DE BONITO

           

Ingredientes

·         200 g de atún

·         Algas

·         Lata de mexillóns ao natural

·         500 ml de leite

·         100 g de manteiga

·         125 g de fariña

·         100 g de pan relado

·         2 ovos

·         Fariña para rebozar

·         Sal /Aceite para fritir.

                                                          

Preparación

1.  ROUX: Nunha tixola, manteiga a derreter + fariña ata que se integre e se despegue das paredes, procurando que se cociñe ben a fariña. Engadir un pouco de leite (quecido previamente e salgado) e seguir remexendo coas variñas. Botar o resto do leite e seguir remexendo ata formar unha bechamel cremosa que se despegue das paredes.

2.    Engadir bonito esmiuzado + mexillóns picadiños + algas. Arrefriar.

3.    Introducir a masa arrefriada nunha manga e facemos as croquetas.

4.    Pasalas por fariña + ovo batido + pan relado.

5.    Fritir en aceite quente. Poñelas sobre papel de cociña. Presentar e servir.