RISOTTO DE COGOMELOS

Estamos en tempada de cogomelos e a nosa receita de hoxe ímola combinar cun exquisito RISOTTO.

O noso equipo ao final da sesión viuse arriba e xa estaban pensando en apuntarse a MASTERCHEF. Estamos progresando e pouco a pouco van sentíndose máis seguros e ilusionados nos fogóns.

RISOTTO DE COGOMELOS

           

Ingredientes

·         150 g de arroz (dúas racións)

·         150 g de cogomelos de tempada

·         ½  pemento  vermello

·         ½ cebola

·         1l de caldo de verduras

·         Follas de perexil, menta e albahaca

·         Queixo parmesano relado

·         Sal / aceite de oliva

Preparación

1.    Lavar os cogomelos, secalos e trocealos. O mesmo coas herbas aromáticas.

2.   Levar o caldo a ebullición. Sofreír a cebola picada con 4 culleradas de aceite ata que transparente. Incorporar os cogomelos e o pemento e refogalos. Sazoar lixeiramente.

3.  Engadir o arroz (dúas medidas) e sofreilo ata que estea perlado (quedar lixeiramente traslúcido). Verter tres medidas de caldo quente por cada medida de arroz e cocer 16´aprox. remover a miúdo engadindo caldo a medida que o vaia absorbendo o arroz.

4.  Retirar. + Queixo, + herbas aromáticas. Integralas e repousar o arroz 2´. Servir.


_________________________________________________

ESTAMOS DE NORABOA!

 A nosa querida e xa experta Marta A, alumna do noso obradoiro de cociña deste curso,  mandounos esta excelente proposta de risotto. Feita por ela e disfrutada con toda a súa familia. Parabéns Marta.

BUÑUELOS DE CREMA PASTELEIRA DE CABAZA

Non vos asustedes! Son moi fáciles de facer!
Se queredes soñar con eles...podedes facelo!
Os buñuelos están nestas datas por todas as pastelerías e confeiterías.

Non imos falar de prezos pero coa nosa receita podedes conseguir uns 50-60 buñuelos, dependendo do tamaño na fritura.
AVISO IMPORTANTE: Levar un á boca e unha perdición. Xa non seredes capaces de parar. Estades avisados. O noso equipo de cociña quedou marabillado do seu resultado.  

BUÑUELOS CON CREMA PASTELEIRA DE CABAZA

 Ingredientes buñuelos

·         Catro ovos

·         125 g de fariña + ½ sobre de levadura

·         25 g de manteiga

·         Dúas culleres de azucre

·         Rela de limón

·         1 ¼ vaso de auga

·         Chisco de sal

·         Azucre

·         Aceite

Preparación

1.    Mesturar nun cazo: auga + manteiga + azucre + rela de limón + sal.

2.   Cando ferva, engadir a fariña de golpe e remexer cunha culler de madeira ata que a masa se separe das paredes do cazo. Separar do lume.

3.   Coa masa temperada, engádense os ovos un a un. Non engadir o seguinte ata que o anterior estea integrado. No derradeiro ovo, dependendo da textura da masa pódese engadir somentes a xema.

4.   Quecer o aceite nunha tixola fonda. Cando aínda non estea moi quente, coa axuda de dúas culleriñas, botar pequenos montonciños de masa coa tixola retirada do lume. Deixar que inflen e arrimar de novo a tixola ao lume para que doren.

5.   Escorrer e sacar da tixola para un papel absorbente. Arrefrialos e salferilos coa azucre.

6.    Rechealos coa crema pasteleira de cabaza.

Ingredientes da crema pasteleira de cabaza

·         Catro xemas

·         125 g de azucre

·         125 g de nata líquida

·         375 g de leite

·         40 g de Maicena

·         Casca de limón

·         Puré de cabaza (150 g ou a cantidade que desexedes)

Preparación

1.   Mesturar e quecer nun cazo: leite + nata líquida + metade de azucre + casca de limón.

2.   Nun bol, mesturar e bater as xemas e ( Maicena + resto do azucre) ata que dobren o seu volume.

3.  Mesturar o contido do bol cun pouco de leite do cazo. Engadir o puré de cabaza.

4.    Botar todo no cazo co resto do leite (coado previamente) e deixar que espese ao baño maría. Remover de seguido para que non se pegue ao cazo.

5.  Cando a crema teña a textura desexada, arrefriala nun recipiente cun papel film transparente por riba da crema para que non colla casca.

SAMAÍN

Se queredes pasar un rato divertido na cociña propoñémosvos rescatar o noso receitario ( POSTRES DE MEDO PARA O SAMAÍN)  elaborado fai un par de anos pero que aínda sabe de rechupete.

PIZZA DE TORTILLA E HORTALIZAS

Comida "FUSIÓN"?

Aquí tedes a nosa queridísima e saborosa TORTILLA DE PATACAS de toda a vida e a archicoñecida e aclamada PIZZA.

Cun pouco de todo e unha elaborada e divertida proposta chegamos a isto. Mereceu a pena. Xuntamos sabores e logramos vencer medos a probar cousas novas. Incluso unha integrante do nosos equipo de cociña sorprendeuse ao ver por primeira vez un pemento vermello por dentro, sorpresa ao saber que estaba oco. Nunca deixamos de sorprendernos cos nosos cociñeiros-as. 

PIZZA DE TORTILLA E HORTALIZAS

           

Ingredientes

·         2 patacas

·         6 ovos

·         Cebola

·         4 rebandas de touciño entrefebrado

·         ½  pemento  verde

·         ½ pemento vermello

·         Champiñóns fileteados

·         Tomate frito

·         Mozzarella relada

·         Follas de albahaca / ourego seco

·         Olivas negras

·         Aceite de oliva /sal / pementa

Preparación

1.  Pelar, lavar, cortar en láminas e pochar as patacas. Incorporar a cebola e refogala.

2.    Retiralas e quitar o exceso de graxa e salpementalas.

3.    Lavar os pementos e cortalos en dadiños.

4.  Salpementar e bater os ovos. Engadirlles as patacas e callar catro tortillas finas duns 20cm de diámetro.

5.   Colocalas sobre unha placa con papel de forno e engadirlles dúas culleradas de tomate a cada unha.

6.   Distribuír a mozzarella, os pementos, o touciño entrefebrado, os champiñóns, a albahaca lavada e seca, o ourego e as olivas en rebandas. Gratinar 4´. Retiralas e servir.

PANINI MEDITERRÁNEO

Pequena homenaxe aos cada vez máis esquecidos nos nosos patios de colexio: os BOCADILLOS.
Están sendo amplamente superados pola bollería industrial, os zumes envasados ou "as merendas-aperitivo". 
Ver un "bocata" dos de toda a vida, dos de pan fresco e recheo tradicional non está a resultar tarefa fácil. A nosa cociña quere sacudir os nosos padais cunha explosión de sabores e colores para recuperar terreo, se é posible, coa proposta deste "PANINI".
Chamoume moito a atención comprobar que a metade do equipo de cociña non probara nunca as olivas negras ou non sabía que había tomates secos ou que a cebola morada tivese un punto picante.
Mesturar na boca todos eses sabores á vez transformou a súa primeira impresión de noxo noutra ben distinta: QUERER MÁIS para seguir disfrutando do momento. IMOS POR BO CAMIÑO!

PANINI   MEDITERRÁNEO

           

Ingredientes

·         Pan de olivas ou similar

·         1 cebola morada

·         2 pementos  vermellos asados

·         50 g de tomates secos en aceite

·         50 g de olivas negras sen óso

·         50 g de queixo de cabra de rulo

·         Mostaza de Dijon

·         Aceite de oliva

·         Sal e pementa

Preparación

1.    Pelar a cebola e cortala en plumas.

2.    Cortar os pementos e tomates en tiras. Enxaugar as olivas e cortalas en aros.

3.    Mesturar todo nun bol e salpimentar.

4.   Dourar en toradas o queixo, nunha tixola ben quente, un minuto por cada lado cunhas gotas de aceite.

5.   Abrir o pan pola metade e untar a cara da miga coa mostaza e repartir na base a ensalada. Engadir unha torada de queixo e tapar coa outra tapa de pan.